Hermiet

 

Hermiet

(‘n Lukrake troefkaart uit die groter arkana)

 

Kyk op na die berge en wonder of dit stil is daar bo want hier onder in die klowe eggo klinkende metaal en luidende simbale en ander kakofoniese byprodukte van die morsige middelgang en selfs in die katedrale van stille afsondering, filter gefragmenteerde en repeterende gespreksgrepe deur gebrandskilderde filters van vriendskap en jy sal vergeefs soos Moses staf-in-die-lug al hierdie Dinge uit mekaar probeer hou, want die klank sal net verder bots en koggel met die uithouvermoë van irrasionele nommers en selfs meer irrasionele woorde; jy sal ook vergeefs die stilte prober raaklees tussen die lyne en die woorde, die spasies, kommas en punte waarbinne jy ontsyfer en ontleed aan ‘n ononderbroke morsekode .. ….;. …;.. ,. . , … . en selfs al sal jy jou staf en lamp optel en jou gedagtes vel-af stap op die pelgrimstog van insomnia, sal dit nie help nie, want met dagbreek sal jy dieselfde bed opmaak waarin jy reeds weet  jy vanaand weer gaan slaap.